لا طب نافع لحُبك ولعْشاب
تشعْوَط هالكلب منْك ولعْشاب
اِعْذر لهفتي لكربك ولعْشاب
اريدك يمّي لا تبعِد عليه
@@@@@@@@@@@
لجَمالكْ لاحلو أليوصل ولاشيك
حبيبي إنته واضوّجنّك ولاشيك
لا كاش أليسدْ سعرك ولاشيك
غالي وبالحِسن تنغَرْ عليّه
@@@@@@@@@@@
أنه اقربْ لو بعدتْ سنين ودني
لحبيبي الكََلبه من زمان ودني
يشوكًََي أليوم يمْ هواي ودني
أخَبْرَنّه بغيابه شصار بيّه
@@@@@@@@@@@
يطير الشوك للأحباب ودنه
نضلْ يمهُم أنه وهلروح ودنه
أصير انْكَس من ألبذات ودنه
إذا أنسى الحبيب الصار ليه
@@@@@@@@@@@
صديق وصُحبِتَك حلوه وغالي
وأكابر دوم أنه بحُبَك وغالي
لأن حُبَك صُبَح ساحة وغالي
وآنه بلا سلاح شلون بيه
@@@@@@@@@@@
لاني الماي ألتشربه ولهْواك
ومالي خِلك الاعيبك ولهواك
إتركْ كَلبي ما حِبْك ولهواك
وأرحل لا تزيد ألضيم بيه
@@@@@@@@@@@
وجهه مطَرّز بشامه وحَب بيه
بيدي كون اكمشنّه وحب بيه
أحب أسمه وصفاته آنه وحب بيه
عِتابه وياي من يزعَلْ عليه
@@@@@@@@@@@
عليّه شلون سود ليال مرّن
وغيابك هلكَلب علضيم مرّن
رحِت أركض على ألنقال مرّن
طِلَع توقيت مو دكَتك عليه
@@@@@@@@@@@
أحبه وما أحبْ غيره ونَهوى
وأطيح بنظرة عيونه ونهَوى
هوّه آنه بجسم واحد ونهَوى
وتِبادَل كَلبي وي كَلبه سويّه
@@@@@@@@@@@
إنتي وهلعِشك ظهري مَحَدْبيه
دخلتي شلون دلاّلي مَحدْبيه
إبقي بكَلبي وتوّنسي مَحدبيه
إنتي أول غرام يصير لَيه
@@@@@@@@@@@
أبد يَهواي ما ملك ولامِلْ
وأبقى بدَربَك ومازِل ولاملْ
إبعِد ما نِقَص حُبَك ولامِلْ
أصلا بالعَكس يزداد بيه
@@@@@@@@@@@
دوله وبالشرف يخْفكَ علمهه
وأخذَت من علي وطه علمهه
زلّت عن دروب الحكَ علمهه
وضلّت نايمه بحضِن الرزيه
@@@@@@@@@@@
مَلْ مني ألصبر ياناس ملاّت
من شفت ألعراق اليوم ملاّت
ألف مذهَب وأنه المرعوب ملاّت
من شِفت الاخو يكفّر اخيه
@@@@@@@@@@@
إيدك يا أخي شميصير حِبهه
وأشكُر الله ولدنياك حبهه
إذا الدنيه أنكسَر بالضيم حِبهه
ينفع منهه نطلُب كاس ميّه؟؟
@@@@@@@@@@@
سامر البابلي
الإثنين يوليو 07, 2008 11:16 pm